கால்நடை மருத்துவப் படிப்புகள்
தரவரிசைப் பட்டியல் அடுத்த வாரம் வெளியீடு
Akwa Academy
சென்னை, ஜூலை 2: கால்நடை மருத்துவப் படிப்புகளுக்கான மாணவர் சேர்க்கைக்கு 25,544 மாணவர்கள் விண்ணப்பித்துள்ளனர். இவ்விண்ணப்பங்கள் பரிசீலனை செய்யப்பட்டு, அடுத்த வாரம் தரவரிசைப் பட்டியல் வெளியிட திட்டமிடப்பட்டுள்ளது.
தமிழ்நாடு கால்நடை மருத்துவ அறிவியல் பல்கலைக்கழகத்தின் கீழ் கீழ்க்கண்ட 7 இடங்களில் கால்நடை மருத்துவக் கல்லூரிகள் உள்ளன:
- சென்னை
- நாமக்கல்
- திருநெல்வேலி
- ஒரத்தநாடு
- சேலம் (தலைவாசல்)
- உடுமலைப்பேட்டை
- தேனி (வீரபாண்டி)
இங்கு ஐந்தரை ஆண்டுகள் கொண்ட பிவிஎஸ்சி ஏஹெச் (BVSc & AH) படிப்புக்கு 660 இடங்கள் உள்ளன.
மேலும், திருவள்ளூர் மாவட்டம் கோடுவேளியில் உள்ள உணவு மற்றும் பால்வளத் தொழில்நுட்பக் கல்லூரியில்:
- பி.டெக் (B.Tech) உணவுத் தொழில்நுட்பம் – 40 இடங்கள்
- பி.டெக் பால்வளத் தொழில்நுட்பம் – 20 இடங்கள்
இதேபோல், கிருஷ்ணகிரி மாவட்டம் ஒசூர் மத்திகிரியில் உள்ள கோழியின உற்பத்தி மற்றும் மேலாண்மை கல்லூரியில்:
- பி.டெக் கோழியின தொழில்நுட்பம் – 40 இடங்கள்
இந்த மூன்று பி.டெக். படிப்புகளும் 4 ஆண்டு காலம் கொண்டவை.
பிவிஎஸ்சி ஏஹெச் மற்றும் பி.டெக் படிப்புகளுக்கான மாணவர் சேர்க்கை விண்ணப்பப் பதிவு https://adm.tanuvas.ac.in என்ற இணையதளத்தில் மே 26 முதல் ஜூன் 20 வரை நடைபெற்றது.
பிவிஎஸ்சி ஏஹெச் படிப்புக்கு 20,516 மாணவர்களும், பி.டெக் படிப்புகளுக்கு 5,028 மாணவர்களும், மொத்தம் 25,544 மாணவர்கள் விண்ணப்பித்துள்ளனர்.
விண்ணப்பங்கள் பரிசீலனை செய்யப்பட்டு, அடுத்த வாரம் தரவரிசைப் பட்டியல் வெளியிடப்படும் என தமிழ்நாடு கால்நடை மருத்துவ அறிவியல் பல்கலைக்கழகம் தெரிவித்துள்ளது.
Leave a Comment