2006 பதவிக்கு குரூப் 2ஏ மெயின் தேர்வு
தமிழகம் முழுவதும் 21,000 பேர் எழுதினர்
சென்னை, பிப்.9: குரூப் 2ஏ மெயின் தேர்வு தமிழகம் முழுவதும் நேற்று நடந்தது. 2006 பதவிக்கு நடைபெற்ற தேர்வை சுமார் 21 ஆயிரம் பேர் எழுதினர்.
தமிழ்நாடு அரசு பணியாளர் தேர்வாணையம் (டிஎன்பிஎஸ்சி) குரூப் 2, குரூப் 2ஏ பணியில் காலியாக உள்ள 2,540 பணியிடங்களை நிரப்புவதற்கான அறிவிப்பை கடந்த ஜூன் மாதம் 20ம் தேதி வெளியிட்டது.
குரூப் 2 பணியில் தொழிலாளர் உதவி ஆய்வாளர், துணை வணிக வரி அலுவலர், இளநிலை வேலைவாய்ப்பு அலுவலர், நன்னடத்தை அலுவலர், சார்பதிவாளர் (கிரேடு 2) என 534 பணியிடங்கள் அடங்கும்.
குரூப் 2ஏ பணியில் கூட்டுறவு சங்கங்கள் முதுநிலை ஆய்வாளர், உள்ளாட்சி நிதித் தணிக்கை உதவி ஆய்வாளர், காவல் உதவியாளர், மருத்துவம் மற்றும் ஊரக நல சேவைகள் உதவியாளர் உள்ளிட்ட 48 துறைகளில் 2006 பணியிடங்கள் இடம் பெற்றிருந்தன.
இந்த பதவிக்கான முதல்நிலை தேர்வு செப்டம்பர் 14ம் தேதி நடந்தது. இத்தேர்வை 5,81,305 பேர் எழுதியுள்ளனர். தேர்வுக்கான முடிவுகள் டிசம்பர் 12ம் தேதி வெளியிடப்பட்டன.
மெயின் தேர்வு விவரங்கள்
குரூப் 2ஏ பதவியில் 2006 பணிக்கான மெயின் தேர்வு நேற்று நடந்தது. காலை 9.30 மணி முதல் 12.30 மணி வரை பொது அறிவு மற்றும் பொது திறனறிவு தேர்வு நடைபெற்றது.
மதியம் 2 மணி முதல் மாலை 5 மணி வரை தமிழ்மொழி தகுதி தேர்வும் நடந்தது. பொது அறிவு தேர்வை 21,563 பேர் எழுதினர். பொதுத் தமிழ் தேர்வை 16,457 பேர், பொதுஆங்கிலம் தேர்வை 5,106 பேர் எழுதினர்.
தமிழகம் முழுவதும் 82 தேர்வு மையங்கள் அமைக்கப்பட்டிருந்தன. சென்னையில் திருவல்லிக்கேணி, விருகம்பாக்கம், அயனாவரம் உள்ளிட்ட 11 பள்ளிகளில் தேர்வு நடந்தது.
தேர்வு விதிமுறைகள்
பொது அறிவியல் பகுதியில் 100 வினாக்கள், பொது திறனறிவில் 40 வினாக்கள், பொதுத் தமிழில் 60 வினாக்கள் என மொத்தம் 200 வினாக்கள் கேட்கப்பட்டன. ஒரு கேள்விக்கு 1.5 மதிப்பெண்கள் வழங்கப்பட்டது.
தேர்வர்கள் தேர்வு நேரத்திற்கும் 1 மணி நேரத்திற்கு முன்னதாக தேர்வு கூடங்களுக்கு வர வேண்டும் என்று அறிவுறுத்தப்பட்டிருந்தது.
செல்போன், கால்குலேட்டர், வாட்ச் உள்ளிட்ட மின்னணு சாதனங்களை தேர்வு மையத்திற்குள் கொண்டு செல்ல தடை விதிக்கப்பட்டது.
பாதுகாப்பு ஏற்பாடுகள்
தேர்வு மையங்களில் பலத்த போலீஸ் பாதுகாப்பு போடப்பட்டிருந்தது. தேர்வு எழுதுபவர்கள் தவிர, வேறு யாருக்கும் அனுமதி அளிக்கப்படவில்லை.
முறைகேடுகளை தடுக்க டிஎன்பிஎஸ்சி அதிகாரிகள் சோதனை மேற்கொண்டனர். மேலும், மாவட்ட கலெக்டர்கள் தலைமையில் கண்காணிப்பு குழுக்கள் அமைக்கப்பட்டு தேர்வு முறைகேடுகளை தடுக்க நடவடிக்கை மேற்கொள்ளப்பட்டது.
