2,700 ஆசிரியர்களுக்கு நியமன ஆணை வழங்கப்படும்
புதுக் கட்டடம் திறப்பு விழாவில் முதன்மைச் செயலர் தகவல்
கோவை, ஜூன் 20: தமிழகத்தில் 2,700 ஆசிரியர்கள் ஆசிரியர் தேர்வு வாரியம் மூலம் தேர்வு செய்யப்பட்டுள்ளனர். அவர்களுக்கு அடுத்த மாதத்துக்குள் பணி நியமன ஆணை வழங்கப்படும் என்று பள்ளிக் கல்வித் துறை முதன்மைச் செயலர் பி. சந்தரமோகன் தெரிவித்துள்ளார்.
இந்த அறிவிப்பு கோவை மாவட்டம் கிணத்துக்கடவு அருகே அரசம்பாளையம் அரசு உயர்நிலைப்பள்ளியில் நடைபெற்ற விழாவில் வெளியிடப்பட்டது. இந்த விழாவில் ரூ. 50 லட்சம் மதிப்பீட்டில் கட்டப்பட்ட 4 வகுப்பறைகள் கொண்ட புதிய கட்டடம் திறக்கப்பட்டது.
இந்த வகுப்பறைகள் 'அமுதச் செம்மல் என். கே. மகாதேவன்' என்ற பெயரில் உருவாக்கப்பட்டுள்ளன. அடிக்கல் நாட்டு விழா 2024-ஆம் ஆண்டு நடைபெற்றது.
விழாவில் முதன்மைச் செயலர் பி. சந்தரமோகன் கலந்துகொண்டு கட்டடத்தைத் திறந்துவைத்தார். நிகழ்ச்சியில் மாவட்ட ஆட்சியர் பவன்குமார் க. கிரியப்பன், ஸ்ரீகிருஷ்ணா ஸ்வீட்ஸ் இயக்குநர் எம். கிருஷ்ணன், ரோட்டரி சங்க தலைவர் வரதராஜன், முதன்மைக் கல்வி அலுவலர் ஆர். பாலமுரளி, தலைமை ஆசிரியர் டி. வித்யா உள்ளிட்டோர் பங்கேற்றனர்.
முதன்மைச் செயலர் உரையில், பத்தாம் வகுப்பு பொதுத் தேர்வில் 100% தேர்ச்சி பெற்ற மாணவர்களை பாராட்டினார். புதிய கட்டடம் மாணவர்களுக்கு உதவியாக இருப்பதுடன், மாணவர் சேர்க்கையையும் அதிகரிக்கும் என தெரிவித்தார்.
மேலும், தமிழகத்தில் பழுதடைந்த பள்ளிக் கட்டடங்களை சீரமைக்க ஆண்டுக்கு ரூ.1,000 கோடி வீதம் மொத்தம் ரூ.4,000 கோடி செலவிடப்பட்டுள்ளது என்றும் அவர் கூறினார்.
இவ்விழாவில் எம். கிருஷ்ணன் கூறியதாவது: புதிய கட்டடத்தில் ஆய்வுக்கூடம், நூலகம் உள்ளிட்ட மாணவர்களுக்கு தேவையான அனைத்து வசதிகளும் ஏற்படுத்தப்பட்டுள்ளதாக தெரிவித்தார்.
